Ca' The Yowes.

I.
Ca' the yowes to the knowes,
Ca' them whare the heather growes,
Ca' them whare the burnie rowes -
My bonnie dearie!
Hark the mavis' evening sang
Sounding Cluden's woods amang!
Then a faulding let us gang,
My bonnie dearie.
II.
We'll gae down by Cluden side,
Thro' the hazels spreading wide,
O'er the waves that sweetly glide
To the moon sae clearly.
III.
Yonder Cluden's silent towers,
Where at moonshine midnight hours,
O'er the dewy bending flowers,
Fairies dance so cheery.
IV.
Ghaist nor bogle shalt thou fear;
Thou'rt to love and heaven sae dear,
Nocht of ill may come thee near,
My bonnie dearie.
V.
Fair and lovely as thou art,
Thou hast stown my very heart;
I can die - but canna part -
My bonnie dearie!
Ca' the yowes to the knowes,
Ca' them whare the heather growes;
Ca' them where the burnie rowes -
My bonnie dearie!