O Tell Na Me O' Wind And Rain.

O Tell Na Me O' Wind And Rain.
I.
O tell na me o' wind and rain,
Upbraid na me wi' cauld disdain!
Gae back the gate ye cam again,
I winna let you in, jo.
I tell you now this ae night,
This ae, ae, ae night,
And ance for a' this ae night,
I winna let you in, jo!
II.
The snellest blast, at mirkest hours,
That round the pathless wand'rer pours,
Is nocht to what poor she endures,
That's trusted faithless man, jo.
III.
The sweetest flower that deck'd the mead,
Now trodden like the vilest weed:
Let simple maid the lesson read,
The weird may be her ain, jo.
IV.
The bird that charm'd his summer-day,
Is now the cruel fowler's prey;
Let witless, trusting woman say
How aft her fate's the same, jo.
I tell you now this ae night,
This ae, ae, ae night;
And ance for a' this ae night,
I winna let you in jo!