The Tither Moon.

To a Highland Air.
I.
The tither morn,
When I forlorn,
Aneath an oak sat moaning,
I did na trow
I'd see my Jo,
Beside me, gain the gloaming.
But he sae trig,
Lap o'er the rig.
And dawtingly did cheer me,
When I, what reck,
Did least expec',
To see my lad so near me.
II.
His bonnet he,
A thought ajee,
Cock'd sprush when first he clasp'd me;
And I, I wat,
Wi' fainness grat,
While in his grips be press'd me.
Deil tak' the war!
I late and air
Hae wish'd since Jock departed;
But now as glad
I'm wi' my lad,
As short syne broken-hearted.
III.
Fu' aft at e'en
Wi' dancing keen,
When a' were blythe and merry,
I car'd na by,
Sae sad was I
In absence o' my dearie.
But praise be blest,
My mind's at rest,
I'm happy wi' my Johnny:
At kirk and fair,
I'se ay be there,
And be as canty's ony.