There's Nought But Care.

Tune - "Green grow the rashes."
Chorus.
Green grow the rashes, O!
Green grow the rashes, O!
The sweetest hours that e'er I spend
Are spent amang the lasses, O.
I.
There's nought but care on ev'ry han',
In every hour that passes, O:
What signifies the life o' man,
An' 'twere na for the lasses, O.
II.
The warly race may riches chase,
An' riches still may fly them, O;
An' tho' at last they catch them fast,
Their hearts can ne'er enjoy them, O.
III.
But gie me a canny hour at e'en,
My arms about my dearie, O;
An' warly cares, an' warly men,
May a' gae tapsalteerie, O.
IV.
For you sae douce, ye sneer at this,
Ye're nought but senseless asses, O:
The wisest man the warl' e'er saw,
He dearly lov'd the lasses, O.
V.
Auld Nature swears the lovely dears
Her noblest work she classes, O:
Her 'prentice han' she try'd on man,
An' then she made the lasses, O.
Green grow the rashes, O!
Green grow the rashes, O!
The sweetest hours that e'er I spend
Are spent amang the lasses, O.